خيرك قاصر وشرك واصل يا سعود
بتاريخ الخميس، 17 سبتمبر 2009
نحن عيال راس الخيمة عارفين البير و غطاه مثل ما يقولون .. و الأوضاع في هذي الإمارة الفقيرة لاتسر عدو و لا صديج .. بس لو حد ايي و يشوف و يكون عنده ضمير على شرط ما يكون من المنافقين اللي ماكلينها و ينابحون مثل الكلاب يدافعون عن أسيادهم . هذا الحاكم الظالم صاك على قلوبنا من ستين سنه و مب شبعان من الدنيا .. من طلعوا أهلنا على ها الدنيا و هم يعانون الأمرين منه ومن ظلمه و زاده عقب بعد ظلم الحرمة بنت بن غرير و عيالها ... الله أكبر شو نهب و ظلم وفجور و المواطن العادي مسكين و فقير يا الله يقدر يطعم عياله هذا بعد جان خلوا له شي ياكله وياهم . خوالهم فتحوا بنك المشرق و عطوا الناس قروض بدون ضمانات و خلوهم يتورطون في تجارة الأراضي و يوم دقت الأراضي بعمرها ما عرفوا يسددون القروض ، فشو سووا ؟ بيعوهم اللي جدامهم ووراهم وبواسطة المحكمة اللي تصدر الأحكام فيها بأمر الحاكم لصالح أنسابه .. الله و أكبر ياهو من ظلم ! كم من الناس بيعوهم حتى بيوتهم اللي ساكنينها .. و الحين سعود هذا المتخلف اللي اغتصب مقدرات البلاد و الشعب طايح سرق و نهب و قمار و بيع خمور و تهريب مخدرات ووصلت به حتى إنه يزرعهن في مشتل البلدية و يبيعونهن في الدايرة ولا من حسيب أو رقيب.. الكسارات هدت الجبال وكلها بيع على دبي تسوي منها جزر ! ماشي تراها أراضي ... الكثافة السكانية أكثر من الأرض ! شو يهمهم هم ما دام البيزات بتدخل جيوبهم .. عيال الناس مساكين اللي يموتون من الربو اللي يتسبب به غبار الكسارات .. نصبوهن حتى تحت المدارس خاصة في الرمس وشعم .. و الجبال خلوها مدافن النفايات ولهذا أعلى نسبة سرطان الأطفال في الدولة مسجلة في راس الخيمة .. واحد شحي مسكين من اللي ساكنين في هذي المناطق ماتوا ثلاثة أولاد عنده و اثنين الحين على الطريج و السبب الأمراض السرطانية و الصدرية .. ومحد قادر يوقف سعود عند حده لا دولة و لا غيرها .. شو السر ! من فترة ظهرت فضيحة الإسمنت المغشوش , بطلها عمر بن صقر ... واحد من أفراد عصابة النهب و السلب , يستورد اسمنت هندي رديء من الهند و يعبونه في أكياس المصانع و ينباع على أساس إنه إسمنت محلي .. غش رسمي ... ! أما الدواير المحلية عاد فحدث و لا حرج .. الأمور كلها ضايعة بس مفتوحة لإدارة أموالهم و أملاكهم و شفط المواطن .. مثلا إذا سار المواطن يطلب قطعة أرض بيبني عليها بيت له هو وعياله يذلونه ذل عليها و سنين لين يحصلها .. و عقب ما يحصلها تتطلع عليه سوالف الرسوم و الدفان و الشارع و الماي و الكهربا و...و... و.. و يدفع المسكين بالديون وقروض البنوك على المعاش و غيره ويسير يبا يستلم الأرض يقابله هناك اللي يسمونه مهندس البلدية ماجد عواد و اللي ما يعرفه هذا واحد فلسطيني ما يفك الخط يانا حافي و الحين هو وأهاليه كلهم مليونيرية .. يوم اييه المواطن يطلب الملكية و الترخيص يقول له أول إدفع لي ميتين ألف درهم حتى أييب لك التمليك ... شو يسوي ها المواطن الفقير غير الرضوخ للأمر الواقع و يدفع .. تتحسبون المسألة انتهت ؟ لا وين ! يسير عاد ها العواد للغولة بنت بن غرير و يخبرها بالأرض .. إذا ما عيبتها تركتها وهذا نادرا ، أما إذا عيبتها لا طرشت على البلدية تتسجل بإسمها و تنضاف لمقاطعاتها اللي تارستبهن البلاد ( أسوار راس الخيمة العظيمة ) و إذا كان المواطن محظوظ دفعوا له عن الأرض ثلاثين ألف أو عوضوه بأرض في وسط الدعاثير ما ينوصل إلها و لا بالهيليوكبتر بس تنشاف على الخارطة .. كل شي رسمي و بأمر الحاكم تراه ! وأشيا وايد وايد ما يوسع المجال الحين للواحد إنه يذكرها .. و الله ها الإمارة اللي يشوفها مستحيل يصدق إنها من دولة الإمارات .. كل الإمارات الباجية في خير و نعمة إلا إمارتنا الكحيانه ... محد قلبه على البلاد و أهلها .. هاذيل الظلام قلوبهم على جيوبهم ما يندرى شقايل مفصلين كفانتهم ! بتوسع هذا كله يا ترى ! و الا بيموتون ميتة جدهم اللي تبرع له واحد قراشي بالكفن يوم مات ! الله على الظالم و المفتري .. والله إذا كانت ثورة الناس تبدأمن شراره فراس الخيمة و أهلها هم شرارتها بسبب القهر و البلاوي اللي عايشينها مساكين .. واصلين للإنفجار و الله يستر ...
تفضل بكتابة تعليق